२१ पुस, काठमाडौं । आईसीसी टी-२० विश्वकप २०२४ मा नेपालले समूह चरणमा तीन टेष्ट राष्ट्रसँग खेल्दैछ । आईसीसीले शुक्रबार सार्वजनिक गरेको खेलतालिका अनुसार नेपाल समूह डी मा परेको छ ।
यस समूहमा टेष्ट राष्ट्र दक्षिण अफ्रिका, श्रीलंका र बंगलादेशसहित एसोसिएट राष्ट्र नेपाल र नेदरल्याण्ड्स छन् ।
नेपालले यसअघि नै बंगलादेश र नेदरल्याण्ड्ससँग टी-२० अन्तर्राष्ट्रिय खेलिसकेको छ भने दक्षिण अफ्रिका र श्रीलंका विरुद्ध पहिलो पटक टी-२० अन्तर्राष्ट्रिय खेल हुनेछ ।
नेपाल रहेको समूहमा दक्षिण एसियाकै दुई टेष्ट मान्यता पाएका देश छन् ।
नेपालले ९ वर्षपछि टी-२० विश्वकप खेल्न लागेको हो । यसअघि सन् २०१४ मा बंगलादेशम भएको टी२० विश्वकप खेलेको थियो ।
टी-२० विश्वकप जुन १ देखि २९ सम्म वेष्ट इन्डिज र अमेरिकामा हुनेछ । नेपालले दुई खेल अमेरिका र दुई खेल वेष्ट इन्डिजमा खेल्नेछ ।
नेपालको पहिलो खेल नेदरल्याण्ड्ससँग जुन ४ मा टेक्सासमा खेल्नेछ । यस्तै दोस्रो खेल जुन ११ मा श्रीलंकासँग फ्लोरिडामा खेल्नेछ ।
त्यसपछि नेपालले दक्षिण अफ्रिकासँग जुन १४ मा र बंगलादेशसँग जुन १६ मा बंगलादेशसँग खेल्नेछ । दुवै खेल सेन्ट भिन्सेन्टमा हुनेछ ।
